Aminado ro barangay council it Poblacion, Kalibo nga uwa sanda it pasilidad nga mabutangan sa mga indibidwal nga may deperensya sa paino-ino engkaso nga pangsikupon nanda ro mga raya.
Kasunod raya sa temporaryong pagkustudiya it lokal nga gobyerno it Kalibo sa daywang ka mga indibidwal nga ginbutang sa sangka pasilidad sa may motorpool.
Suno kay Punong Barangay Neil Candelario, maskin mabahoe nga barangay ro Poblacion, uwa gihapon sanda it ikasarang nga mataw-an it aksyon ro mga ginakabig nga eyesore sa palibot it banwa.
Uwa sigon it nagakaigong pasilidad ro barangay para kanda kamana man uwa sanda it ikasarang nga maita-o ro andang mga kinahang-eanon.
Nauna eon sigon nga natalakay nanda sa konseho nga magpangayo it bulig sa mga concern agency agud nga mataw-an it igtaeopangod ro mga makarundaya nga tawo.
Angot kara, naghimo sanda it resolusyon nga maduso sa Sangguniang Bayan it Kalibo nga mataw-an it igtaeopangod ro mga indibidwal nga may deperensya sa paino ino nga presenteng nagalibot sa banwa.
Apang, ro eubus kunta nga may responsibilidad kanda hay ro andang mga pamilya.
