KALIBO, Aklan—Ginaeauman nga matapos eon sa buean it Setyembre it presenteng dag-on ro prayoridad nga proyekto it Department of Public Works and Highway ukon DPWH partikular ro mga nagapangunang daeanon sa isla Boracay.
Suno kay assistant district engineer Leo Bionat it DPWH Aklan nga ginatinguhaan nanda nga matapos sa nasambit nga buean ro proyekto eabi pa makaron nga ginbuksan eon it uman ro isla para sa mga lokal nga turista.
Ro karsada suno kana hay may eapad nga 6 meters sa magtimbang nga parte kaeakip eon ro drainage system.
Sa makaron suno kana hay may nakataeana nga kapin sa P200 milyon pesos nga pondo para sa iba pang proyekto it ahensya apang hasta sa makaron hay uwa pa nanda raya nabaton kon sa siin naga-eaum sanda nga iga-release raya sa oras nga magtawhay ro krisis nga ginapangatubang it nasyon.
Nagapadayon suno kana ro construction it DPWH sa Boracay ag maging ro mga road maintenance sa bilog nga probinsya it Aklan sa pihak nga nagapabilin ro paeag it Covid-19 pandemic.
