KALIBO, Aklan — Sang domingo antes ro Kuwaresma, preparado eon ro pamunuan it Aklan State University (ASU) Banga campus sa pagdagsa it mga pumueuyu para sa pagpamaeandong ag pagpangamuyo sa Station of the Cross ukon Via Crucis sa Manduyog Hill.
Suno kay Dr. Jeffrey Clarin, president it ASU Banga campus nga haeos 40,000 nga mga deboto ro ginaeauman nga magabisita sa lugar nga makabig nga nagapangunang pilgrim site sa Aklan kada Semana Santa.
Nakaplastar eon sigon ro andang security plan kabulig ro mga katapo it Banga Municipal Police Station, MDRRMO Banga, lokal nga gobyerno ag iba pang natungdan nga ahensitya it gobyerno.
Preparado eon man ro andang mga gintaeana nga rest area.
Haeos natapos eon man suno kana ro andang repainting sa mga life-size nga rebulto sa kada Station of the Cross ag may igataeana nga personnel nga maga-assess sa mga deboto.
Sa nakaandan hay igapatuman sa gihapon ro “one way” pasaka sa ibabaw ag pagpanaog sa bukid umpisa Abril 14 hasta 15 para maging tayuyon ro pagsueod it mga tawo.
Umpisa sa entrance hasta sa ibabaw it Manduyog Hill hay may mga ginplastar sanda nga improvised signages bilang sueondanan it mga pumueuyu.
Samtang, sa ubos it Manduyog Hill hay may pilang stalls sanda nga gin install agud nga rentahan it pilang mga negosyante eabi eon ro mga produkto nga himo sa banwa it Banga.
