KALIBO, Aklan–Ginaduso ni Presidential candidate ag dating Defense Secretary Norberto Gonzales nga bawasan ro overregulation agud nga maging mas madali ro pagnegosyo sa nasyon.
Sa Comelec-KBP PiliPilipinas Forum 2022, engkaso nga maging pangueo it nasyon, ginpahayag ni Gonzales nga dapat nga haeugaan ro mga requirements sa pagnegosyo agud nga maka engganyo it mga dumueuong nga kapitalista kamana man nga mapursige ro mga Pinoy nga makaangkon it kaugalingon nga negosyo.
Raya suno kana ro sangka pamaagi agud nga makasueong ro ekonomiya it Pilipinas.
Samtang, plano man nana nga magtipon it mabahoe nga pondo ukon government guaranteed fund agud nga ipa-utang sa mga Pilipino nga gustong mag-negosyo.
Pagabuhusan man sigon nana it pondo ro Department of Agriculture agud nga makaangkon it bastante nga pagkaon ukon food security.
Sa pihak nga parte, nagapati si Gonzales nga ro wage increase nga ginapanawagan it maabu makaron nga mga trabahador kasunod it pagtinaas it presyo it mga baeak-eon ag serbisyo hay kinahangean nga tun-an it mayad it natungdan nga ahensiya it gobyerno.
Raya sigon hay nakadepende sa daeagan it ekonomiya.
