Nagapabilin gihapon nga mataas ro presyo it asukar sa mga merkado sa bilog nga nasyon.
Ginpahayag ni Betty Robelo, negosyante it asukar sa banwa it Kalibo nga haeos kada dominggo hay nagataas ro presyo it ginabagsak kanda nga suplay it asukar.
Bangud sa masyadong mahae, sangkiri eamang ro andang ginabuoe para eamang may maibaligya sa mga bumaeakae.
Owa sigon sanda it mahimo kundi magpatong man sa kada kilo it asukar para mabawi ro kapital.
Nag-umpisa suno kana ro pagtaas it presyo it asukar matapos ro pagpanaeasa it mga bagyo kung siin nasamad ro mga taeamnan sa probinsya it Capiz ag Negros.
Sa pihak kara, nagaeaum sanda nga maganaba ro presyo it asukar sa Oktobre bangud sa ginatawag nga harvest ag milling season it tubo.
Sa makaron, naga-abot eon sa P96 ro presyo it kada kilo it puting asukar samtang P72 ro kada kilo it brown sugar.
