KALIBO, Aklan—Nagtaas it piso hasta daywang piso ro kada kilo it bugas sa Kalibo public market.
Raya hay base man sa weekly price monitoring it Office of the Provincial Agriculturist kun sa siin naga abot eon sa P60 pesos ro kada kilo it pinakamahae nga bugas sa nasambit nga merkado publiko.
Suno kay Roselyn Relado, focal person it OPA nga ro imported commercial rice nga special hay una sa P52 pesos hasta P56 pesos; ro premium hay P44 pesos hasta P50 pesos ; ag ro well milled rice ukon mga local produced nga bugas hay P47 hasta P48 pesos.
Apang ginklaru it taeatapan nga owa eon sanda makaron it makita nga regular milled rice butang nga posibleng raya ro nagtueod agud nga magsaka ro presyo it bugas.
Sa pihak nga parte, ginpahayag man ni Relado nga nagnaba ro presyo makaron it mais nga kon sa siin ro whole corn hay naga abot sa P28 pesos ro kada kilo samtang ro mga root crops kapareho it mga kamote, balenghoy, gabi ag iba pa hay nagbarato bangud sa bastante nga supply kumpara ko nagtaliwan nga mga domingo nga nakalista it pagtaas sa presyo.
Nasayuran nga ro mga root crops hay gina-obra nga substitute sa bugas.
Madumduman nga nauna eon nga ginpahayag ni Pangueong Ferdinand Marcos Jr. nga madali eon lang nga maabot it nasyon ro P20 pesos nga balor sa kada kilo it bugas.
