KALIBO, Aklan–Haeos doble ro gintaas sa presyo it mga ginabaligya nga souvenir t-shirts nga may naka-imprenta angot sa ati-atihan festival.
Suno kay Stephanie Tayo, sangka negosyante ag nag-renta it stall sa plea market, halin sa dating 180 pesos hay ginabaligya eon raya makaron sa 250 pesos.
Raya hay kasunod it pagmahae it mga materyales nga ginagamit partikular ro t-shirts ag mga pintura.
Ginpahayag dugang nga maskin sanda nga mga negosyante hay excited sa uman nga pagbalik it face to face nga selebrasyon it ati-atihan festival bangud sa ginaeauman nga pagbuhos it mga tawo.
Ginpahayag dugang nga ro iba nanda nga mga kaibahan hay naka-set-up eon it andang mga gamit rason nga medyu maabu eon ro nabakae kanda nga souvenir t-shirts.
Nagabaton sigon sanda it mga customized printing apang sa mga inadlaw nga masako eon hay posibleng kon ano eon lang nga available nga design ro andang iga-offer.
Nagapati man sanda nga makabawi makaron nga tiempo halin sa haeos daywang dag-on nga pagka-tengga tuga it naexperiensiyahan nga covid 19 pandemic.
Target nana nga makabaligya it masobra sa 4,000 nga souvenir t-shirts ukon masobra pa hasta nga matapos ro selebrasyon agud nga makabawi sa andang renta ag iba pang expenses.
