KALIBO,Aklan– Nagapabilin nga suspisyente ro supply it dugo nga sarang nga maka-supply sa kinahang-eanon it pasyente.
Suno kay Mary Joe Galleon, provincial administrator it Philippine Red Cross, Aklan chapter nga raya hay sa bulig man it andang mga partner sa komunidad ag lokal nga gobyerno nga naga-promote it boluntaryong pagdonar it andang hamili nga dugo.
Ginpahayag dugang nga nabuhinan eon ro hangkat sa andang bahin matapos nga naghaeoga eon ro mga restriction bukon it kaparehas ko nagtaliwan nga pandemya nga uwa haeos it nagapatigayon it blood letting activity kamana man uwa it boluntaryong nagadonar it andang dugo sa kabaeaka nga makaapekto raya sa andang ikaayong eawas kasunod sa pagpanaeasa it covid-19 virus.
Apang, uwa gihapon sigon nag-ungkat ro andang taeatapan bangud nga eubus nga kinahang-ean ro dugo eabi eon sa mga regular nga pasyente nga nagapaidaeom sa dialysis.
Angot kara, padayon gihapon nga naga-engganyo ro PRC Aklan sa publiko nga boluntaryong magdonar it andang hamili nga dugo kasunod eon sa pag-arangkada it blood donors month makaron nga Hulyo.
