NATIONAL News —- Kadungan it opisyal nga pag-umpisa it campaign period para sa national positions bilang kaparte it 2022 elections maskin may Covid-19 pandemic, maga-arangkada eon man makaron nga adlaw ro waea-tuo nga proclamation rallies it mga presidential, vice presidential ag senatorial candidate.
Alas-5:30 sa hapon maga-umpisa ro proclamation rally nanday Vice President Leni Robredo ag Senador Francis “Kiko” Pangilinan kaibahan ro andang mga senatorial bet sa Magsaysay Avenue, Naga City sa Camarines Sur.
Magapatigayon man it aktibidad sanday Senators Panfilo Lacson ag Vicente “Tito” Sotto III sa Imus Grandstand, Cavite alas-5:00 it hapon.
Alas-3:00 it hapon igakasa nanday Senator Manny Pacquiao ag Buhay Partylist Rep. Lito Atienza ro andang aktibidad sa General Santos City.
Alas-4:30 paga-umpisahan nanday Manila Mayor Francisco “Isko Moreno” Domagoso ag Dr. Willie Ong ro andang proklamasyon sa Bonifacio Shrine, sa Lawton, Maynila.
Igalunsar man nanday dating senador Ferdinand “Bongbong” Marcos Jr. ag Davao City Mayor Sara Duterte – Carpio ro andang aktibidad sa Philippine Arena sa Santa Maria, Bulacan alas-4:00 it hapon.
Samtang, ala-6:00 hasta alas-9:00 it gabi-i ro proclamation rally nanday labor leader Leody de Guzman ag dating Akbayan Partylist Rep. Walden Bello sa Bantayog ng mga Bayani, sa Quezon City.
