KALIBO, Aklan—Gina-istudyuhan pa it Department of Environment and Natural Resources (DENR) ro ginaproponer nga igapasarado ro isla it Boracay sa sueod it sangka buean kada dag-on ukon himuon raya nga partial ukon by section eamang agud taw-an it daean ro paglimpyo.
Raya hay kasunod it kumpirmasyon ni DENR Undersecretary Sherwin Rigor nga makaangkon it clean-up activity sa isla makaron nag dag-on.
Pwede sigon raya himuon kada lean season ukon sangkiri eamang ro nagabisitang turista sa isla.
Ginpahayag ni Rigor, sa baylo nga bilog nga isla ro isarado kaparehas it natabo ko nagtaliwan nga dag-on, may mga ginaduso nga himuon eon lang raya it by section.
Katuyuan sigon kara nga maipakita sa mga turista nga daeayon ro andang ginahimong rehabilitasyon kamana man agud nga inde eon mauman ro natabong an-om nga bueang Boracay closure nga nag-umpisa ko Abril 2018.
Samtang sa pihak nga parte, padayon ro ginahimong inspeksyon sa mga establisimento sa isla agud masiguro nga mga compliant establishments eamang ro naga-operate.
Nasayuran nga 10 establisimento ro nataw-an it notice bangud sa pag-operate nga uwa it nagakaigong compliance certificate.
