Kalibo Aklan —— Nag-augment it 1,000 food packs sa kada lokal nga gobyerno sa bilog nga probinsya it Aklan ro gobyerno probinsyal.
Raya hay ginakaeakipan it limang kilong bugas, limang ka lata it sardinas ag limang putos it noodles.
Suno kay Provincial Social Welfare Development Office (PSWDO-Aklan) Head Evangeline Gallega, katuyuan sigon kara nga mataw-an ro tanan nga mga pumueoyo nga uwa naabot it LGU sa andang budget.
Nakit-an man sigon nanda ro effort it kada pamunuan it munisipyo bangud bukon eamang it mga delata ro andang ginapanupod kundi ginaeakipan man raya it mga grocery, tinuean-on ag karne.
Sa makaron sigon hay sigidas pa ro andang pagpahaom it mga food packs ag engkaso sigon nga mapaeawig pa ro Enhanced Community Quarantine sa Aklan hay sigurado nga maga-usoy man it tikang ro gobyerno para mapun-an ro kinahang-eanon it mga pumueoyo partikular sa pagkaon.
Aminado man ro opisyal nga bastante ro supply it bugas apang ro mga canned goods hay nagakaubusan eon.
Sa kamatuoran suno kana hay uwa pa ma-produce may tag-iya eagi partikular ro mga taga-National Capital Region (NCR) bangud nga bilog nga nasyon ro tinamaan it COVID-19.
May kaangtanan kara, ginhinyo ni Gallega ro tanan nga mga nakabaton it cash assistance sa idaeom it Social Amelioration Program (SAP) nga ginakaeakipan it P6,000 pesos nga tipiron ro andang nabaton agud nga inde magkalisod it husto ro andang pamilya.
