KALIBO, AKLAN — Nakibot ro mga Aklanon kat masayuran nga taga-Aklan ro sambilog sa mga pulis nga eakot sa pagkastigo sa daywang sibilyan sa Mandaluyong City ag naging viral ro video sa social media.
Si PO1 Jose Jolious Iguiron Tandog hay tumandok it Buruanga, Aklan, nag-eskwela sa Buruanga Vocational School, Joselito Alba Vocational and Technical School (JAVTES) Kalibo ag nagtapos it BS Criminology sa Pamantasan ng Lungsod ng Muntinlupa.
Samtang ginaimbestigahan ro andang kaso, igapadaea sa Marawi City sa nagapadayon nga bakbakan ko tropa it gobyerno ag teroristang Maute group si PO1 Tandog kaibahan si PO1 Chito Enriquez.
Raya hay kasunod it mando ni PNP Chief Director General Ronald “Bato” dela Rosa nga patalsikon sanda sa pwesto.
Nasayuran nga ginbugbog it daywang pulis sa sueod mismo it barangay hall ro mga biktima matapos nga nag-eabag sa ordinansa.
Ginkilaea ro mga biktima nga sanday Marvin Calda ag Macglen Villanueva kon sa siin naboe-an it video ni Calda ro pagpanakit kanda ag nakit-an raya mismo ni General dela Rosa.
Pati eon ro pagtutok it baril ni Tandog hay nakit-an man sa video.
