Ginpahayag ni Russian President Vladimir Putin samtang nakangisi nga pagasuportahan it Russia ro kandidatura ni Democratic nominee VP Kamala Harris sa naga eapit nga US presidential election sa Nobiyembre.
Ginhimo ni Putin ro pahayag sa ginhiwat nga economic forum sa Far Eastern city it Vladivostok ko Huwebes, pilang oras ro nakataliwan matapos pasakaan it sanctions ag criminal charges it US Justice Department ro 2 Russian media executives kaangot sa paghana nga manipulahon o impluwensiyahan ro eleksyon sa Amerika gamit ro pro-Russian propaganda.
Sa mismong forum nakwestyon ro Russian president kaangot sa nagapahueapon nga US election, ikara ginhambae nana nga nakangisi nga ro andang paboritong magdaog hay ro presenteng pangueo it Amerika nga si President Joe Biden apang umatras raya sa eleksyon ag ginirekomenda sa tanan nga anang supporter nga suportahan si Harris, ag makaron man eamang sigon ro andang ubrahon kay Harris.
Matandaan nga bago pa mag-withdraw si Biden sa presidential race, nauna eon nga ginhambae ni Putin nga mas gusto na si Biden kesa kay dating US President Donald Trump bangod mas predictable ag old school politician raya. Nagapati man ro US Intelligence agencies nga gusto it Russia nga magdaog si Trump bangod less committed sigon raya sa pagsuporta sa Ukraine sa giyera kara kuntra sa Russia.
