INTERNATIONAL News — Nagkagulo ro mga pasahero it Qantas flight ko kan-o eamang matapos nga gulpi eamang nga nagguwa ro R-rated film sa kada screen it mga pasahero nga sakay it eroplano.
Base sa statement nga gin-release it Australian airline, gulpi eamang nga nakaeksperyensiya it technical issues sa andang gintan-aw sa screen ro mga pasahero nga sakay it Sydney-Tokyo flight.
Dugang pa it kompaniya nga bangud sa request it mayoriya it mga pasahero, sangka pelikula ro ginpaguwa para sa tanan.
Owa man ginbulgar it Qantas kon ano ro titulo it nasambit nga pelikula, apang base sa mga litrato nga nagkalhit sa social media nga ginpakigbahin it sambilog sa mga pasahero, raya hay ro “Daddio”.
Sangka 2023 drama nga ginabidahan nanday Dakota Johnson ag Sean Penn ag ginkabig nga rated R it US Motion Pictures Association bangud ko “for language throughout, sexual material ag brief graphic nudity.”
Maabu man ro nagreklamo bangud sa pagpaguwa it film nga nag-play it pilang oras antes mabayluhan eabi pa ag may mga pamatan-on nga kaibahan sa flight.
Nagpangayo man it pasaylo ro airline ag nagpasalig nga paga-imbestigaran ro nag-eontad nga insidente.
