Owa pa natumod hasta sa makaron ro ginhalinan it mabahoe nga sunog nga tumupok sa pilang mga establisimento sa Barangay Bulwang, Numancia ko nagtaliwan nga Mayo 29, nga nakalista it danyos nga nag-abot sa masobra sa P43.5 milyon.
Raya hay bangud nga owa pa naka-abot ro resulta it ginpadaea nga mga samples it nasunog nga electrical wire halin sa arson laboratory sa National Headquarters it Bureau of Fire Protection sa Calamba, Laguna.
Suno kay FO2 Adrianne Villas, arson investigator it BFP-Numancia nga engkaso nga mag-negatibo ro resulta sa faulty electrical wiring hay uman sanda nga magapatigayon it imbestigasyon.
Posible suno kana nga sa masunod nga domingo hay magguwa eon ro resulta kara sa ginakabig nga pinakamabahoe nga sunog makaron nga unang limang buean it 2024 sa banwa it numancia ag bilog nga probinsiya it Aklan.
Owa man sigon it pagbag-o sa andang nailista nga danyos bangud nga owa eon man nagpaguwa it affidavit of loss ro tag-ana it multi purpose center nga si Sotico Beltran bangud nga owa man sigon naka-insured ro anang property.
Ro mga establisimento nga naapektuhan sa sunog hay ro sangka Japan Surplus shop, Barbaza Multi-Purpose Cooperative, Glass and Aluminum Works ag sangka motorcycle dealer.
Ginapatihan nga nag-umpisa ro sunog sa sangka pwesto nga dating gina-rentahan it mga negosyanteng Chinese nga ginasugid nga andang gin-abandona matapos nga tumama ro pandemya.
Pila sigon sa mga sueod kara hay mga foam ag iba pang furnitures.
