Ginpaathag makaron it Department of Labor and Employment ukon DOLE-Region 6 kon ham-an nga magkaiba ro sweldo sa nagkaeain-eain nga rehiyon sa nasyon.
Suno kay Atty. Sixto Rodriguez, Regional Director it DOLE Region VI nga ro wage fixing hay trabaho it mga legislators sa kongreso.
Dugang pa nana nga nakabase man raya sa mga klase it ekonomiya sa sangka lugar rason nga indi pwedeng ikumpara ro sitwasyon it kada isaea.
May republic act sigon nga nagapaathag nga ro wage order hay dapat nga nagakasinanto sa socio-economic conditions it sangka lugar ukon rehiyon.
Sa pihak nga parte, ginpaathag nana nga regular ro andang DOLE-TUPAD program ag may budget nga naka-alokar.
Nagatinguha sigon sanda nga magpangayo it extension sa COMELEC angot sa mga makarondaya nga programa ag aprubado man sigon.
Paathag nana nga agud malikawan nga maintrahan it pulitika ro programa hay may mga guidelines ag advisories sanda nga ginahimo sa mga probinsiya ag ibang ahensiya nga andang kaibahan.
Ginpasiguro man nana nga indi dapat mapundo ro mga serbisyo it gobyerno sa mga pumueuyo bangud sa kahilwayan sa pagboto.
