KALIBO, Aklan —- Gin-aprubahan it Regional Tripartite Wages and Productivity Board (RTWPB) ro petisyon para sa pataasan ro sweldo sa Western Visayas.
Ginpahayag ni Labor regional director Sixto Rodriguez Jr. nga nakataeanang iga-review it National Wages and Productivity Commission (NWPC) ro wage increase sa rehiyon antes nga eubusan nga maging pinal.
Ro dugang sa sweldo hay halin P55 hasta P110 para sa mga workers sa Western Visayas.
Sa pihak nga parte, ginpahayag pa ni Rodriguez nga ginpasakaan man it RTWPB ro sweldo para sa mga “kasambahay” nga halin sa P4,000 paagto sa P4,500 kada buean.
Ro mga empleyado sa mga pribadong establisimento nga may 10 nga trabahador panaba hay sarang makabo-oe it kada adlaw nga sweldo nga P420 halin sa presenteng P310.
Samtang, ro mga may empleyado nga masobra sa 10 nga trabahador hay dapat nga bayaran ro andang mga obrero it P450 halin sa P395 kada adlaw. Ro agricultural workers hay makabo-oe it P410 halin sa P315.
Nasayuran nga ulihing nagpatuman it wage increase sa Western Visayas kato pang Nobyembre 2019.
Gindugang pa ni Rodriguez nga pirmado it tanan nga mga RTPWB members ro bag-ong wage orders nga magiging epektibo sa oras nga matapos ro pag-review ag pag-apruba it NWPC kamana man nga ma-publish raya sa mga peryodiko.
Posible suno kana nga antes ro Hunyo 12 hay mapatuman eon raya.
Ginasugid nga ro orihinal nga ginapangayo nga daily minimum wage it labor sectors hay P750.
