KALIBO, Aklan–Ginsushestiyon ni Kalibo Sangguniang Bayan member elected Ronald Marte nga usuyan it pondo ro rehabilitasyon it Kalibo Public Market.
Suno kay Marte, kinahang-ean nga ayuson ag limpyuhan ro tindahan agud nga maging paborable sa parehong vendors ag bumaeakae.
Nagakadapat suno kana nga ayuson ro porsyon it nasunugan agud nga amat-amat nga makabalik ro mga apektadong stall owners.
Mag-euwas kara, kinahang-ean man suno kana nga mag-usoy it mabahoe nga lugar para sa plano nga pagpatindog it modernong tindahan nga may mabahoe nga espasyo ag parkingan it mga saeakyan ag motorsiklo.
Raya sigon hay paga-istoryahan pa nanda sa tunga it executive ag legislative para maplastar ro tanan nga butang kamana man nga masayuran ro kagustuhan it mayorya.
Sa pihak nga parte, nagaeaum si Marte nga maaprubahan it kongreso ro proposiyon nga salary grade para sa mga opisyal it kada barangay.
Mabahoe sigon ro maibulig kara sa kapareho nana nga barangay official eabi eon sa mga maisot nga lugar nga may manaba nga Internal Revenue Allotment (IRA).
Ginpahayag dugang nga ro presenteng ginabaton nga honorarium it mga barangay official hay maisot eamang ag masami nga kueang pa.
