KALIBO, Aklan — Nagapadayon ro demolisyon sa mga istrakturang nakatindog sa wetland areas sa Boracay kapin eon sa wetland no. 4 ukon mas kilaea sa tawag nga Lake Town sa bahin it Barangay Balabag sa isla.
Sa interview it Bombo Radyo, ginpahayag ni Community Environment and Natural Resources Office (CENRO)-Boracay head Atty. Richard Fabila, katuyuan kara nga marekober ro siyam nga mga wetlands, kon siin ginatutukan nanda sa makaron ro wetland numbers 2, 3, 4 ag 6.
Ginpasaeamatan man ni Atty. Fabila ro mga maeagkong kompaniya sa nasyon bangud sa bulig it mga raya pamaagi sa andang “adopt a wetland” program.
An-om nga wetlands ro plano nga patindugan it park nga dugang atraksyon sa mga turista.
Ginaeaumang matapos ro rehabilitasyon sa wetlands 2 ag 4 antes ro reopening it isla sa Oktubre 26.
Samtang, uman nga ginklaro ni Atty. Fabila nga ro mga permanent residents eamang ro pagataw-an it relokasyon samtang ro mga transients hay gin-abisuhang mag-usoy it andang masayluhan.
