KALIBO, Aklan—Nagpanindugan ro barangay council it Estancia, Kalibo nga insigidang gin-aksyunan ro reklamo ni Paulo Laurenza, tag-ana it Laurenza residences and dormitory sa Melgar road sa nasambit nga barangay angot sa masangag nga mga alagang inugbueang nga manok.
Suno kay punong barangay Daisy Andrade it Estancia, Kalibo nga gin-agtunan nanda ro lugar kaibahan ro LGU-Kalibo partikular sa zoning ag health department ag ro Kalibo PNP.
Apang ro problema suno kana hay kon owa it nagabantay sa lugar hay balik sa dating gawi ro mga pasaway nga residente.
Naintindihan sigon nanda ro reklamo it foreigner bangud nga malimpyo ag malinong ro nasyon nga anang ginhalinan.
Samtang, gindugang pa ni kapitan Andrade nga matapos nga ireklamo ro gintukod nga basketball court hay dayun nanda raya nga ginpakakas ag ginlimpyuhan ro lugar.
