KALIBO, Aklan—Nagapabilin makaron sa Aklan provincial hospital ro sangka 28 anyos nga repatriated overseas Filipino worker nga taga-banwa it Lezo matapos nga nagpositibo sa Covid-19 ro anang confirmatory result.
Suno kay Provincial Health Officer 1 Dr. Cornelio Cuatchon, kaparte it health protocols nga iga-isolate sa ospital ro magpositibo sa sakit maskin nga uwa raya it sintomas nga ginabatyag.
Ginpahayag pa ni Dr. Cuatchon nga una eon nga negatibo sa real time-polymerase chain reaction ukon RT-PCR test sa Metro Manila ro seafarer nga nag-abot ko Marso 30 halin sa Germany.
Ko Mayo 25 nag-uli sa Aklan ro ofw nga nagdiretso man sa Aklan training center ag ginpaidaeom sa profiling kamana man ginboe-an it swab test for repeat testing antes nga gin-quarantine sa gintaeana nga ligtas covid center it LGU-Lezo sa sangka hotel nga maeapit sa Kalibo International Airport.
Nagpabilin it pilang adlaw sa quarantine facility ro ofw antes nga ginpasugtan nga magpaidaeom sa strict home quarantine.
Apang, ginpabutyag nga uwa sigon natapos it seafarer ro anang home quarantine ag nagguwa raya it panimaeay kon sa siin may gin-adtunan pang ibang lugar.
Sa makaron hay nagapatigayon eon it contact tracing ro ahensya sa posibleng mga nakasalamuha it pasyente.
Ro nasambit nga seafarer hay ro pang siyam nga kaso it Covid-19 sa Aklan.
Samtang sa pihak nga parte, kapin sa 126 confirmatory result pa it mga repatriated ofw’s ro nakapending makaron sa Western Visayas Medical Center, sub-national laboratory it Department of Health ukon DOH sa region VI.
Kaangot kara, nagpadumdom si Dr. Cuatchon sa mga nagpaidaeom sa strict home quarantine nga inde ro mga raya magpinanaw samtang uwa pa natapos ro andang quarantine period para man sa kaeowasan it tanan partikular it andang mga himata nga posibleng makasalamuha it mga raya sa oras nga makaguwa sanda it tagsa nanda ka panimaeay.
