Ginklaru ni Malay Sangguniang Bayan member Alan Palma Sr., nga resolusyon pa eamang ag bukon pa it laye ro andang gin-aprubahan nga nag-angkon it unanimous vote nga nagapamaeabag sa ginaproponer nga Caticlan-Boracay bridge project.
Suno kana nga ro resolusyon hay nagasirbing opisyal nga pahayag it posisyon it konseho angot sa proyekto.
Nakaangkon sigon it revision sa titulo it resolusyon nga gin-author ni SB Member Hope Christine Pagsuguiron agud nga maging klaru nga ro mga nagakontra eamang sa proyekto ro nagapamaeabag kara bangud nga may ibang sektor nga naila mat’a ukon nagaduso sa pagtukod it tulay.
Ro resolusyon hay may titutlong “A Resolution of Objection of the Affected Sectors and Stakeholders in Malay for the Proposed Caticlan-Boracay Bridge.”
Ginpaathag dugang nga raya hay nagasaeaming sa collective position it konseho nga ro proyekto hay posibleng magtuga it mabahoe nga peligro sa environment eabi eon sa mga coral reefs, pangabuhian it mga residente, kita it probinsiya ag munisipyo.
Nagpaandam si SB Palma nga posibleng magtuga ro proyekto it pagkaduea it dag-unan nga kita it probinsiya nga naga-abot sa ₱300 milyon hasta ₱360 milyon halin sa ginasukot nga terminal fees engkaso nga maging operational eon ro tulay.
Ro nasambit nga income it probinsiya ag munisipyo hay ro nagapanguna nga ginaboe-an it ginagastos sa social services kapareho it operasyon sa Aklan Provincial Hospital ag iba pang government hospitals.
Mabahoe suno kana ro posibilidad nga bangud sa mabahoe nga investment it kompaniya sa pagpatindog it tulay hay pagabawi-on raya pinaagi sa pagsukot it toll fees sa mga residente ag biyahero nga magagamit kara patabok sa Boracay.
Nagpanindugan man ro opisyal nga ro andang resolusyon hay base sa kamaeayran it komunidad ag bukon sanda it anti-development.
Hasta nga owa sigon it pormal nga presentation it proyekto sa provincial ag municipal government kamana man sa mga posibleng maapektuhan nga stakeholder hay mabahoe ro tsansa nga magiging kwestiyunable ro proyekto.
