Kalibo Aklan ——Dead on arrival sa Aklan Provincial Hospital ro sangka eaeaki matapos nga bumunggo sa kapareho karang motorista bandang alas 7 kabi-i sa Sitio Proper 2, Brgy. Tambak, New Washington.
Ginkilaea ro biktima kay Enrique Gualberto, 27-anyos, tumandok it Brgy. Binanugan, Valderama, Antique apang presenteng naga-istar sa Brgy. Andagao, Kalibo.
Base sa report, maghalin sa direksyon it Brgy. Dumaguet ro biktima kat pag-abot kara sa nasambitang lugar owa nana mapan-uhan ro pagliko it kaparehong motorista nga nakilaea kay Cherry Elliserio, 37-anyos.
Nagaguwa nga owa nag-signal light si Elliserio sa anang pag-u-turn rason nga owa raya mapan-uhan it biktima ag bumunggo imaw idto.
Bangud sa kabaskog it impact it pagkabunggo hay insigidang binawian it kabuhi ro biktima samtang ninahan man ro kabungguan kara ag nagapabilin nga naka-confine sa nasambitang ospital.
Nasayuran nga una sa impluwensya it makahieilong nga ilimnon si Illeserio kat matabo ro aksidente.
