KALIBO, Aklan—Ro Tuberculosis ukon TB hay impeksyon sa baga nga nagahalin sa sangka klase it bacteria.
Mag-euwas sa baga, ro bacteria hay puwede man nga magkapyot ag magtuga it impeksyon sa bato, tue-an, panit, utak ag iba pang organs it tawo.
Ro TB hay makamaeatay ag makahaeawa rason nga nagakinahang-ean raya it maidid nga pagbueong.
Ginarekomenda man it World Health Organization (WHO) ro Directly Observed Short Course (DOTS) program para mas mapadali ro pagbueong kara.
Mabahoe ro maibulig it DOTS program sa tamang pag-inom it bueong sa TB.
Raya hay ginapatigayun it mga health workers kapareho it mga doktor ag nars para buligan ro mga tawo sundon ro dosage ag tamang schedule sa pag-inom it mga bueong.
Suno kay Dr. Glenford Refre, Internist-Pulmonologist nga kapin sa 3 million katawo ro nagakamatay kada dag-on sa bilog nga kalibutan bangud sa tuberculosis.
Nagaguwa man sa datus nga pang siyam raya sa mga rason it pagkamatay sa probinsya it Aklan.
Importante sigon nga makumpleto ro pagbueong sa TB.
Posible sigon nga makabatyag it sangkiri nga ginhawa matapos ro pilang dominggo nga pagtumar it bueong apang kung insigida raya nga pagapunduhon, pwedeng magbalik ro bacteria ag posibleng maging mas mabaskog ro resistensya nanda kontra sa mga medisina.
Kung siin, magiging mas mabudlay buengon ro TB engkaso nga matabo raya.
