KALIBO, Aklan—Plano it sangguniang bayan it Kalibo nga ipatawag ro mga nagadumaea it mga airline companies agud nga mausuyan it solusyon ro nagataeupangdan nga pagnaba it numero it mga flights sa Kalibo International Airport.
Sa ginpatigayon nga session, nagpahayag it pagka-alarma ro mga konsehal bangud sa insidente nga posibleng maka apekto sa pagbangon it ekonomiya nga nauna eon nga naapektuhan it pandemya.
Base sa report, antes ro pandemya hay nakakalista it haeos 30 nga mga regional flights halin sa South Korea, Hong Kong, Macau, Taiwan, ag mainland China ag 10 nga domestic flights sa Kalibo International Airport.
Apang sa makaron , kaabuan sa mga flights hay nagatugpa sa caticlan airport partkular ro mga turista nga nagabakasyon sa isla it boracay.
Bangud sa ap-at hasta limang flights adlaw-adlaw nga ginapatigayon it Philippines Airlines, Cebu Pacific, ag AirAsia Philippines, pagahinyu-on sigon it SB nga madugangan pa ro nasambit nga numero sa paeuparan it Kalibo.
Samtang, plano man makaron it lokal nga gobyerno it Kalibo nga magtukod it dugang nga mga tourism infrastructure ag iba pang nagakaigo nga pasilidad.
