KALIBO, Aklan—Naging inspirasyon sa kaabuan ro sangka katutubo nga tumandok it isla it Boracay matapos nga pangaeanan bilang kauna-unahan nga Aeta sa bilog nga probinsiya it Aklan nga nakapasa sa Licensure Examination for Criminologist ko nagtaliwan nga buean it Pebrero.
Si Olimar F. Tamboon, sangka miyembro it Boracay Ati Tribal Organization (BATO) hay determinado nga maging sangka police officer matapos nga gin-anunsyo it Professional Regulation Commission (PRC) nga kaibahan imaw sa 15,684 nga nakapasa halin sa kabilugan nga 32,495 examinees, ukon 48.27 percent it February 2024 Criminologists Licensure Examination nga ginpaguwa ro resulta kahapon nga adlaw it miyerkules.
Ginpaabot it Aeta community ro andang kalipay ag pagdayaw kay Tamboon partikular it anang mga ginikanan nga sanday Oliver ag Maria nga nagsuporta sa anang pagtuon sa pihak it malisod nga pagpangabuhi nga ro nagapanguna nga trabaho hay ro pagpanguma.
Imaw ro unang miyembro it andang aeta community nga nakapasa sa nasambit nga licensure exam.
Ginasugid nga gin-antus ni Tamboon ro tanan nga kalisod agud eamang nga maabot ro anang handum nga makatapos it pag-eskwela sa kolehiyo.
