KALIBO, Aklan—Dead on arrival sa Madalag District Hospital ro sangka eaeaki matapos nga ginhatok-hatok it pagbuno sa banwa it Madalag.
Nag-angkon it siyam ka mga lastro sa eawas ro biktima nga nakilaea kay Noel Donato, 56-anyos, residente it nasambitang lugar nga naging rason it anang hinali nga kamatayon matapos nga ginhatok-hatok imaw it pagbuno it ginatumod nga suspek nga si Charlie Mar Nala, 27-anyos, residente it Sitio Libas, Brgy. Alas-as, Madalag.
Base sa imbestigasyon it pulisya, gabakae sigon it bahog it baboy sa sangka baraka sa Guadalupe Street ro biktima kat nakit-an imaw it suspek sakay it sangka motorsiklo kaibahan ro daywang iba pa nga persona.
Kung sa siin gulpi eamang nga gin-eumpatan it suspek ro biktima ag ginhatok-hatok it pagbuno gamit ro sangka siyaw-duko.
Nasayuran nga may dati eon nga alitan ro magtimbang nga parte.
Insigidang nag-iskapo ro suspek apang sa owa magbuhay hay nag-surrender man raya sa Numancia PNP.
Sa makarun hay sa paghinakop eon it Madalag Municipal Police Station si Nala para sa nagakaigo nga disposisyon.
