KALIBO, Aklan–Sangka 59-anyos nga babayeng koridor ro naaresto it mga kapulisan sa ginpatigayon nga anti-illegal gambling operation ukon Republic Act 9287 sa sueod it sangka bueangan kahapon it hapon sa Brgy. Laguinbanua East, Numancia.
Ginkilaea ro nadakpan nga si alyas May, residente it Brgy. Old Buswang, Kalibo.
Suno kay P/Capt. Maricel Guevarra, hepe it numancia municipal police station nga haeos tatlong buean man nanda nga gin-surveillance ro suspek antes nga ginkasa ro operasyon matapos nga madakpan raya sa akto nga nagakolekta it bet money it illegal nga number games.
Narekober sa anang posesyon ag kontrol ro ginapatihan nga taya nga naga abot sa kabilugan nga 13,000 pesos , ballpen , gambling paraphernalias ag iba pa.
Ginpaidaeum eon kaina sa inquest proceedings sa Aklan prosecutors office ro suspek sa kasong pag-eabag sa RA 9287.
Suno kay P/Capt. Guevarra nga ro kadaeag-an it numancia pnp station kontra sa sunud-sunod nga operasyon kontra sa illegal nga sugae hay sangka pamatuod nga owa sanda nagapundo sa pagsukoe sa mga nagakatabu nga illegal activities agud nga magapabilin nga eowas ag maayos ro banwa.
