KALIBO,Aklan– Ginkasubo ni Aklan first district board member Nemesio Neron nga may akeanon eon man nga nabiktima ro New Peoples Army ukon NPA nga napasunod sa andang bulok nga kawsa.
Raya kasunod sa pagkumpirma nga si Maria Rita Malandac, tubong Purok 2 C Laserna St. Kalibo apang presenteng naga-istar sa Oton, Iloilo nga kaibahan nga nadakpan ni Prince Igudas sa entrapment operation sa Brgy. Calangcang, Makato hay mga aktibong miyembro it NPA.
Suno kana, mas mayad eon lang sigon nga nadakpan ro mga raya agud nga maneutralize ro andang aktibidad ag inde eon makapanloko it iba pa.
Madumduman nga ro panaw ni Igudas sa nasambit nga lugar hay agud nga kobrahon ro ginpangikil nga kwarta sa sangka tag-iya it construction firm apang nabulalyaso matapos nga mga operatiba maghalin sa PNP ag AFP ro anang nakatransaksyon rason nga sumukoe ag nabarilan sa anang hita.
Nauna eon nga ginpamalibaran ni Malandac nga uwa imaw it kasayuran sa pamanaw it suspek ag ko kan-o eamang sanda nagkita it uman.
Gin-ako it babaye nga dati eon imaw nga naging aktibista apang uwa eon napadayon ko ulihi bangud sa kaakig it anang ama.
