KALIBO, Aklan—Nagapangatok makaron it bulig sa mga tawong may mabinueawanon nga tagipusuon si Mr. Andrew Pastrana, residente it Brgy. Cawayan, New Washington para mabuligan ro anang igmanghod nga babaye nga may deperensya sa paminsaron.
Suno kana, nagdesidir imaw nga ikandena ro mga siki ni Angela para indi makagguwa it baeay bangud masami sigon raya nga nagakaduea.
Bukon sigon nana it intensyon nga masakitan ro anang igmanghod apang ginkinahang-ean nana raya nga ubrahon para sa anang ikamayad.
Halin sigon kat magtaliwan sa pihak nga kinabuhi ro andang ginikanan hay imaw eon ro nag-alaga kay Angela.
Aminado si Andrew nga dobleng kalisod ro anang ginapas-an bangud mag-eowas sa pag-alaga sa anang manghod hay imaw man ro naga-isaeahanon nga nagapangita.
Ginasugid nga nag-umpisa nga maduea sa katinuan si Angela matapos imaw nga mag-uli halin sa Metro Manila ag ginapatihan nga imaw hay gin-kulam it dating nagpangasawa kana.
Bangud sa kapigaduhon, owa eon nanda imaw nahimo nga mapatan-aw sa doktor ag nagdiretso eon lang sa albularyo.
Ginpakamayad man ni Andrew nga ibutang sa maisot nga espeasyo si Angela kung siin dikara imaw nagapataliwan it oras kada adlaw.
Gusto eamang sigon nana nga mabuligan ro anang igmanghod rason nga nagpaabot raya it panawagan sa Bombo Radyo.
