KALIBO, Aklan–Dismayado ro sangka ginang matapos nga mabiktima it mga miyembro it salisi gang sa sueod it mismong establisyemento sa banwa it Kalibo.
Suno kay May Remudo, residente it Brgy. Muguing, Banga nga samtang nagapili imaw it tsinelas hay may kadungan imaw nga daywang ka mga babaye sa anang mansig kilid.
Nagpangutana pa sigon kana ro sambilog sa mga raya kung pila ro presyo it tsinelas ag gilayon man nana nga ginsabat.
Apang, makataliwan ro pilang minuto hay madasig nga nadueaan ro daywang persona.
Kat magabayad eon kunta imaw sa cashier dikato pa eamang nana natueopangdan nga owa eon ro anang kahita matapos nga buksan ro anang bag.
Eubos man ro pagkasubo ag pagkanugon it biktima sa P2,000 nga sueod it anang kahita ag pilang ka mga ID.
Ginpahayag pa kara nga pambayad nana sa eskwelahan ro iba sa kwartang nabuoe kana.
Sa pagreview sigon it CCTV, nakumpirma nga nadukutan imaw.
Gin-abisuhan sigon imaw it establisyemento nga magpa-blotter sa Kalibo PNP para ipa-record ro hitabo.
Sa makaron hay nagapabilin pa nga blangko ro biktima sa pagkatawo it daywang ka mga babaye.
