KALIBO, Aklan–Nagpasimpaead nga mag-adto ag magpila sa ABL Sports Complex ro sangka ginang sa pag-eaum nga maeakip sa listahan it makabaton it educational assistance halin sa Department of Social Welfare and Development (DSWD) sa ikatlong Sabado it pagpanupod.
Suno kay Anabel Dela Cruz, residente it Ochando, New Washington nga nagaeaum imaw nga maging sambilog sa mataw-an it ayuda.
Plano kunta nana nga gamiton ro kwarta sa pagbakae it school supplies it anang unga.
Suno sa ginang, owa imaw it cellphone ag nagpa-iba eamang imaw sa anang kakilaea para mag-walk in.
Pasado alas-6:00 it agahon sigon kat nag-adto imaw sa payout venue.
Matueopangdan nga owa nagabaton it “walk-in” beneficiary ro DSWD kung siin ginataw-an nanda it prayoridad ro mga nakaparehistro online ag nakabaton it text message.
