KALIBO, Aklan—Arestado ro sangka gina-alegar nga nagaduso it ilegal nga droga sa ginpatigayon nga buy bust operation sa Federico Quimpo Avenue, Capitol Site, Brgy. Estancia, Kalibo, hapon it Huwebes, Disyembre 5, 2024.
Ginkilaea ro suspek nga si certain Ivan Charles Leonil Deloria, 23-anyos, sangka job order employee it LGU-Kalibo nga naka-assign sa Barangay Affairs Office ag residente it Brgy. Linabuan Sur, Banga.
Ginasugid nga naging target imaw it buy-bust operation sa pagpanguna it PDEA-Aklan ag Aklan Maritime Police matapos nga matukiban nga naga-sideline raya sa pagbaligya it iligal nga droga.
Narekober sa suspek ro haeos sang kilo it marijuana nga naka-bricks ag nakasueod sa sangka plastic nga bag-o eamang nana nga ginpick-up halin sa sangka courier company.
Haeos tatlong buean nga ginsubaybayan it mga awtoridad ro suspek nga nakikipagtransaksyon online halin sa unknown source.
Dugang pa nga nabo-oe man sa anang posesyon ag kontrol ro kapin sa P20,000 nga buy-bust money, cellphone, wallet ag iba pang non-drug items.
Aminado man ro suspek nga nagagamit imaw it marijuana agud nga makatueog.
Samtang, emosyunal ro ina it suspek kat makita ro natabu sa anang unga.
Ro suspek hay gindaea sa custodial facility it kalibo municipal police station ag magapangatubang sa reklamong pag-eabag sa RA 9165 ukon Comprehensive Dangerous Drugs Act of 2002.
