Kalibo Aklan ——Bangud sa ginpatuman nga Enhanced Community Quarantine hasta ko ulihi hay ginbutang eon sa General Community Quarantine ro bilog nga probinsya it Aklan tuga it coronavirus disease (COVID-19) pandemic, natengga ro mga baeayran it mga pumueoyo.
Raya hay matapos nga nagsarado ro mga negosyo sa sueod it daywang buean.
Kaangot kara, ginreklamo sa Bombo Radyo ni Jay-Ar ro sangka kumpanya it motor sa banwa it Kalibo matapos nga uwa sanda nagta-o it rebate sa sueod it daywang buean nga uwa nabayaran ro ginahueogan nga behikulo.
Suno kana, mag-eowas nga uwa eon sanda pagtaw-i it rebate hay may ginapabayran pa nga penalidad bangud sa delay nga pagbayad.
Ginpahayag dugang nga posibleng uwa ro mga raya nagsunod sa Bayanihan to Heal As One Act nga ginapatuman it National Government bangud nga ginapigos sanda sa pagbayad ag uwa it konsiderasyon ro nasambitang kumpanya.
Samtang sa pihak nga parte, ginklaro ni Verline Mata, Director it nasambit nga kumpanya nga uwa sanda it ginapatong nga interest ukon maskin anong penalidad sa andang mga kliyente sa tunga it ginapangatubang nga krisis.
Nagasunod sigon sanda sa mando it gobyerno ag aprubado it andang pamunuan ro mga extension sa pagbayad it andang mga kliyente sa maskin siin nga branch sa Western Visayas.
