KALIBO, Aklan — Nagapangatubang sa kasong pag-eabag sa Republic Act 10591 ukon Comprehensive Firearms and Ammunition Regulations Act ro sangka 35 anyos nga eaeaki matapos nga makumpiska it mga awtoridad sa sueod it anang baeay ro bukon it lisensyadong mga baril ag mga bala sa ginpatigayon nga search warrant operation sa Barangay Camanci, Batan, bandang alas-6:40 it agahon it Miyerkules, Abril 9, 2025.
Suno kay Police Capt. Ryan Batadlan , OIC chief of police it Batan Municipal Police Station nga ro suspek hay nakilaea kay alyas Niño, sa legal nga edad, may asawa, sangka manug-oling ag residente it nasambit nga lugar.
Sa ginpatigayon nga operasyon, nabo-oe sa kwarto sa sueod it anang baeay ro sangka caliber .22 rifle, airgun rifle, sangka magazine nga may 4 nga bala it caliber .22, sangka caliber .45 magazine nga owa it bala, ag daywang caliber .45 cartridge.
Ro tanan nga mga armas ag bala nga nakumpiska halin sa suspek hay presenteng sa kustodiya it Batan MPS para sa tamang disposisyon.
Ro pagdihon it search warrant hay nag-ugat sa serye it mga reklamo kontra sa gina-alegar nga pagpinaeupok it suspek it anang baril sa nasambit nga lugar.
Suno kay Capt. Batadlan nga ro kadaeag-an it nasambit nga operasyon hay nagapakita it andang determinasyon nga suk-ean ro illegal nga pagtago ag pagpanag-iya it baril kun sa siin mas pang ginhugpan makaron it PNP ro kampanya kontra sa loose firearms eabi pa ag nagahilapit ro midterm elections.
