KALIBO, Aklan—Ginkalipay it mga recipient it pabaeay sa Barangay Briones, Kalibo ro pagbutang it police outpost sa nasambit nga lugar.
Suno kay Mrs. Nenita Tugna, sambilog sa mga residente sa nasambit nga lugar nga mabahoe nga bulig ro pagbutang it police outpost agud nga insigidang makaresponde sa anuman nga kinagamo nga matabu.
Nagaeaum man sanda nga malikawan eon ro mga insidente it panakawan sa lugar.
Ro pabaeay hay may 400 nga units ag ginaeauman nga madugangan pa.
Gindugang pa ni Tugna nga kabay nga bukon eamang it outpost ro ibutang kundi ro naga-duty mismo nga pulis agud nga matahap ro mga outsider nga mag-obra it kinagamo.
Nasayuran nga ro outpost hay may kaugalingon nga karsel ukon presuhan.
Mag-eowas kara, ginpasaeamatan man it mga residente ro pagbutang it mga street lights ag CCTV it lokal nga gobyerno it Kalibo, apang nagaeaum nga madugangan pa bangud nga may mga portion sigon nga madueum pa.
