KALIBO, Aklan — Nagapati si dating Sangguniang Panlalawigan member ag political analyst sa Aklan nga si Atty. Harry Sucgang nga posibleng makabulig sa presidential bid ni dating US President Donald Trump ro natabu nga assassination attempt kana sa tunga it ginpatigayon kara nga campaign rally sa Pennsylvania para sa maabot nga eleksyon sa Nobyembre.
Suno kay Atty. Sucgang nga mabahoe ro posibilidad nga makabulig sa anang kadaeag-an ro pakikisimpatiya it mga botante sa Amerika ag bilog nga kalibutan bangud sa natabu nga paghana sa anang kabuhi.
Kaeabanan suno kana nga sa pulitika kon sin-o ro dehado ukon namatyan hay imaw ro ginbotohan bangud sa nagapangibabaw nga kaeo-oy nga nabatyagan.
Apang kon paga-usisaon sigon it mayad ro track record ni Trump hay makita nga bukon it manami maskin ro anang pamaagi sa pag-asenso sa anang mga negosyo .
Dugang pa ro owa nana pag-concede kat mapierde sa nagtaliwan nga 2024 eleksyon kabaliskaran sa nakasanayan sa mga pulitiko sa Estados Unidos nga kon mapiyerde hay hantup sa tagipusuon nga ginabaton ro andang kapalaran .
Imaw eamang suno kay Atty. Sucgang ro kauna-unahan nga presidential candidate nga napierde sa US election nga owa nag-concede .
Bulok man sigon ro polisiya dati ni Trump sa pagtratar sa mga migrants sa Amerika .
Sa pihak kara, ginakabig ni Atty. Sucgang nga masyadong seryoso ro natabu nga assassination attempt maskin nga kaeabanan eon raya nga nagakatabu sa nasambit nga nasyon .
Owa man imaw nagapati nga obra-obra eamang ro natabu bangud nga mag-eowas nga may kabuhi nga naduea hay nadaplisan man si Trump maeapit sa anang dueunggan.
Nakilaea ro 20 anyos nga gun man nga sangka sharp shooter ag miyembro it sangka gun club sa Pennsylvania.
Ginpaathag man ni Atty. Sucgang nga sa Amerika ginapasugtan eamang nga mag-pungko bilang presidente ro sangka kandidato it maximum nga waeong dag-on kumpara sa Pilipinas nga owa it reelection kon makompleto ro an-um nga dag-on nga pagpanerbisyo.
