NUMANCIA, Aklan—Ginklaru it Tricycle Operators and Drivers Association nga may biyaheng Bulcampus nga owa sanda eubusan nga ginabawaean kaibahan ro iba pang grupo nga biyaheng Numancia nga magsueod sa banwa it Kalibo.
Suno kay Louie Rivas, presidente it nasambit nga grupo nga hugut nga ginapatuman makaron it pamunuan it Traffic and Transport Management Division ukon TTMD it lokal nga gobyerno it Kalibo nga mapatuman ro terminal to terminal system.
Maskin nga solusyon sigon raya agud nga maayos ro daeagan it trapiko ag mapaeayo sa anuman nga peligro ro mga commuters nga naga-abang sa entrance it Kalibo-Numancia bridge, apang may pilang mga drivers ro nagareklamo.
Nakabaehag sigon sa naga eksister nga ordinansa nga bawae nga magpick-up it pasahero maskin siin ro mga tricycle drivers nga pabalik sa numancia .
Aminado man si Rivas nga napilitan ro iba nanda nga kaibahan nga mag-lagare ukon magbiyahe nga owa pa ro andang turno bangud sa mabuhay nga pila nga kon amat hay gina-abot it tatlong oras antes nga makaguwa it terminal .
Kaeabanan suno kana nga nagahueat sa bukana it tulay ro ibang mga pasahero eabi eon ro mga nagadali ukon naga-eagas it oras .
Pabor mat-a sigon kanda nga mga nagatiyaga nga magpila sa terminal ro nasambit nga patakaran ag pag-instrikto it mga KAP members agud nga madisiplina ro mga pasahero nga mag-agto sa tama nga sakayan .
