Mabahoe nga perwisyo sa makaron para sa mga residente it brgy.Jawili sa banwa it Tangalan ro padayon nga pagkalhit it mga sangkaterbang basura sa andang lugar partikular sa may bahin it CAAP.
Ro nasambit nga lugar hay ginadagsa it mga publiko bangud sa overlooking view kara ro Jawili beach.
Ginakasubo gid ni Punong barangay James Tumbagahan it nasambit nga barangay ro nagapadayon nga problema it andang barangay.
Sa kamatuoran, bukon eamang sigon it raya ro unang kahigayunan nga nakatipon sanda it sangkaterbang basura maghalin sa nasambit nga lugar.
Nga kung siin sa ginpatigayon nandang coastal clean up hay uman sanda nga nakakolekta it sinaku nga mga basura ag kinahangean pang maggamit it dump truck sa sobrang kaabuon.
Ginapatihan nga ginahungod it pilak ro mga nasambit nga basura bangud sa makabig nga ginhimu eon ro area nga dumping site.
Sa pihak nga parte, ginpasiguro man ni Tumbagahan nga may ginahimo eon sanda nga aksyon para matapna eon ro mga nagapadayon it kalhit it basura.
Samtang, nag-apela man imaw sa mga gustong magpadueong sa andang barangay nga maging responsible sa andang basura ag likawan ro pagpilak it andang mga basura bangud sa bukon it dumping site ro nasambit nga lugar.
