KALIBO, Aklan—Ginaduso makaron it Sangguniang Bayan it Kalibo nga magtukod it kaugalingon nga animal bite treatment center agud nga mas pang mapabaskog ro kampanya kontra rabies.
Base sa resolusyon nga gindihon nanday SB member Ronald Marte ag Ketchie Luces, ginahinyu kara si Kalibo Mayor Emerson Lachica pinaagi sa municipal health office nga magtukod it animal bite center ag magtaeana it pondo para kara.
Sa makaron hay may animal bite facility sa sueod it provincial hospital, apang masyadong mahaba ro pila it mga pasyente nga nagahalin sa nagkaeain-eain nga banwa it Aklan agud nga makaangkon it anti-rabies shots.
May una man sigon nga semi-private nga animal bite center nga nagatau it libreng turok sa unang kahigayunan ag may bayad eon ro mga masunod nga treatment sa mga pasyente nga naangkit it sapat.
Ro nasambit nga clinic sigon hay naghalin eon sa provincial hospital ag naga-usoy makaron it masayluhan.
Suno kay SB member Marte nga maskin nga bukon it seasonal ro rabies, maabu nga mga animal bites ro ginaeauman kada summer.
Ginatun-an makaron it LGU-Kalibo kon pagabatunon ro nasambit nga klinika nga maga-operate kabulig nanda.
