KALIBO, Aklan—Nagpaguwa it resolution ro sangguniang bayan it Malay agud nga klaruhon sa publiko eabi eon sa andang mga pumueuyu nga owa sanda it ginpaguwa nga endorsement angot sa pagpatindog it kontrobersiyal nga tulay nga magakonekta sa Isla it Boracay ag Tabon baybay sa Caticlan.
Suno kay Argao punong barangay Mannie Casidsid ag nagatindog nga ex officio member sa SB Malay nga ko nagtaliwan nga adlaw it Huwebes hay tigsambilog sanda nga ginpangayuan it sentimiento ag opinyon angot sa ginaplano nga proyekto it San Miguel Corportation.
Hasta sa makaron sigon hay owa pa nakapaeapit kanda ro nasambit nga kompaniya agud nga iplastar ro kaundan it andang proposal eakip ro mga plano agud nga indi maapektuhan ro pangabuhian it mga pumueuyu engkaso nga madayun ro proyekto.
Sa kamatuoran suno kana nga maskin imaw hay bukon it pabor sa pagbutang it tulay bangud nga bukon eamang ro kooperatiba it mga boat operators ag members ro maapektuhan kundi maskin ro mga cargo boat.
Nakibot sigon sanda kat nagpatigayon it silent protest ro Caticlan-Boracay Transport Multi-Purpose Cooperative ag MATODA pinaagi sa motorcade nga nag-agi sa munisipyo it Malay.
Sa social media eamang sigon nanda nasayuran nga may gintaeana eon nga pondo para sa proyekto nga naga-abot sa haeos P5.5 bilyon.
Ginpasiguro man nana nga bago iga-endorso ro proyekto hay maga-agi sa tamang proseso ag pagtuon partikular ro pagpatawag it public hearing agud nga mabo-oe ro pulso it publiko.
Amindo man si Kapitan Casidsid nga mag-eowas sa mga negatibong epektibo hay may nakikita man sanda nga positibong epekto sa pagtukod it tulay.
Sa pihak nga parte, ginpahayag ni Malay SB member Alan Palma Sr., nga magapaguwa sanda it andang natungdan nga panindugan sa nasambit nga isyu sa oras nga makita eon nanda ro kaundan it proposed project it SMC.
Apang hasta sa makaron hay owa pa nakabaton ro LGU-Malay ag SB it aplikasyon angot sa ginaduso nga proyekto.
