KALIBO, Aklan—Ginpasiguro it barangay council it Pook Kalibo ro seguridad sa mga magatambong sa sangka free concert nga pagapatigayunon makaron sa Pook jetty port .
Suno kay Pook punong barangay ag sangguniang bayan member elect Ronald Marte nga may gintaeana nga mga katapo it kapulisan, MDRRMO, KAP members ag mga tanod sa nasambit nga event nga ginaeauman nga pagadagsaon it maabu nga mga tawo.
Ginpahayag dugang nga magiging dere-deretso ro andang pagbantay umpisa sa pag uli it mga beachgoers nga nagpaligos sa baybay para sa kapiestahan ni San Juan de Bautista hasta nga matapos ro concert hinduna nga gabi-i.
May igataeana man sanda nga mga parking areas agud nga masiguro nga ro mga nagasueod ag nagaguwa nga mga saeakyan sa lugar hay mapabilin ro kaayusan.
Samtang, owa eamang sa jetty port nakatutuk ro andang atensyon kundi sa bilog nga lugar kun sa siin nagtaeana sanda it mga nagapatigayon it foot patrol sa beach front agud nga malikawan ro mga untoward incident.
Nasayuran nga ro iba nga owa nakapa-reserve it cottage sa may parte it Pook Lambingan beach hay nagplastar it kanya-kanyang tent ag tolda para sa selebrasyon.
