KALIBO, Aklan—Nagpangayo it pag-intindi sa publiko ro sektor it transportasyon sa western side partikular ro Kalibo-Malinao nga rota sa pagpataas nanda it pamasahe sa mga nagabiyahe nanda nga multicab ag jeep.
Suno kay Edgar Igcazensa, Manager it Malinao Lezo Transport Cooperative nga ro pagpatong nanda it dugang nga pamasahe hay agud nga maskin paalin hay may iga-uli man sanda nga kita sa andang natungdan nga mga pamilya.
Mag-eowas suno kana nga limitado gihapon ro seating capacity hay nagapabilin nga mataas ro presyo it gasolina.
Apang ginklaru ni igcazensa nga halin sa dating 40 pesos nga pamasahe halin kalibo paagto it Malinao kat 50% pa ro seating capacity, gin-obra raya makaron nga 30 pesos kat gin-adjust sa 70%.
Ginpahayag pa ni Igcazensa nga engkaso nga imandu it land transportation franchising and regulatory board ukon LTFRB-6 ag land transportation office ukon LTO-aklan nga ibalik sa regular nga panueuktan ro pamasahe hay owa sanda it mahimo kundi nga magsunod agud nga owa it may paga-eabagon nga laye.
Apang kinahangean man anay sigon nga pamatian ro andang bahin agud nga makaangkon it win-win solution.
Nagpaabot man imaw it sentimiento sa gobyero bangud sa kawad-an it insigidang ayuda ko tiempo nga sanda hay nagakalisod.
Nakabaton sigon it cash aid ukon subsidiya ro mga drivers sa idaeum it service contracting drivers program it LTFRB, apang bukon it tanan hay nakabenepisyo.
Mabahoe man kunta nga bulig sa mga PUJ drivers kon kanda gintau ro libreng sakay program apang raya hay gintaeana sa mga pribadong kompaniya bangud nga owa pa na-modernize ro andang mga unit.
