KALIBO, Aklan—Naka-abot eon sa pamunuan it Kalibo Ati-Atihan Festival Board ukon KAFEB ro natabu nga medyu malaswa nga pag-poll dancing it pilang pamatan-on sa sangka stage sa ginhiwat nga foam party, ro finale sa mga event nga ginpatigayon sa opening salvo it Kalibo Sto. Niño Ati-Atihan Festival 2023.
Suno kay P/Major Jason Belciña, hepe it Kalibo Municipal Police Station nga tanan nga mga naobserbahan nga mga kakueangan ag saea sa nagtaliwan nga event hay pagatalakayon agud nga indi eon matabu sa mismong Ati-Atihan Festival sa buean it Enero.
Kaibahan pa sa pagatutukan hay ro re-routing scheme.
Aminado man ro opisyal nga nakaangkon sanda it problema sa ginpatuman nga one-way route.
Indi man sigon nanda ma-pull out ro mga saeakyan nga naka-park eon sa ginabawae nga parking area bangud nga mag-eowas nga owa it towing service hay mabudlay eon nga ma-locate ro mga nagapanag-iya it saeakyan antes pa man ro deployment it kapulisan bandang alas-12 it udtro adlaw.
Ginpasiguro man ni Belciña nga mas ginapahauman it PNP ro seguridad sa mismong Ati-Atihan Festival sa masunod nga dag-on.
