KALIBO, Aklan — May mabahoe nga epekto sa mga convicts ag sa andang pamilya ro pahayag ni Pangueong Rodrigo Duterte nga engkaso nga indi maka-eagas sa gintaeana nga deadline sa pagsurender, hay igamandu ro shoot to kill order sa mga napahilway sa idaeum it good conduct time allowance ukon GCTA law.
Raya ro ginpahayag sa Bombo Radyo ni dating Magdalo Party-list Representative Gary Alejano.
Dapat suno kana nga ro mga ginpabalik eamang hay ro mga napahilway nga may heinous crimes ag naka-benepisyo sa gina-alegar nga GCTA for sale.
Nasayuran nga kapin sa 1,900 nga mga inmates ro ginpaguwa bangud sa GCTA nga kon sa siin pila sa mga inmates hay napanaba ro prison terms bangud sa pagpakabuot sa sueod it presuhan.
Nauna eon nga ginmandu ni Duterte ro pagsurender nanda sa sueod it 15 diyas, kun sa siin nagtapos eon Huwebes it tungang gabi-i, bangud nga kon indi hay pagakabigon sanda nga mga pugante .
Samtang, ginbatikos man ni Alejano ro Duterte administration bangud sa pagbasoe kara sa dating administrasyon sa kapalpakan sa implementasyon it nasambit nga layi.
Nagapati imaw nga kinahangean nga maamyendahan ro GCTA law.
Madumduman nga nabutang sa kontrobersiya ro GCTA law ukon RA 10592 kasunod it nakataeana kunta nga pagpaguwa sa convicted murderer ag rapist nga si dating Calauan, Laguna Mayor Antonio Sanchez.
