KALIBO, Aklan—Ginpamalibaran it Barangay council it Bakhaw Norte, Kalibo nga ro sighting it gina-alegar nga buaya sa suba nga sakop it andang lugar hay natabu kahapon nga adlaw it Martes, kundi nga ko Pebrero 11 pa.
Raya ro ginklaru ni Punong Barangay Reysy dela Cruz it Bakhaw Norte, Kalibo sa Bombo Radyo Kalibo.
Suno kana nga matapos nga mabalitaan ro nakita nga buaya, insigida imaw nga nag-agto sa baeay ni Mrs. Bhebhe Sabay-Sabay, 63 anyos ag residente it Sitio Ilaya sa nasambit nga lugar agud nga maboe-an it nagakaigo nga impormasyon.
Nagduha-duha sigon imaw nga mag-report sa barangay angot sa anang nasaksihan samtang nagabo-oe it ueang sa suba bangud sa pagkabaeaka nga owa it may magapati kana.
Suno kana nga eubus ro anang pagkakibot matapos nga makita ro ueo it buaya nga naka-alsa sa tubi.
Ginaboeobanta suno kana nga ro kabahoe kara hay makasarang nga magkaon it tawo ag iba pang kasapatan.
Ginakabaeak-an sigon nanda nga magtuga raya it halit sa iba pang sapat ukon mismong mga tawo, kun sa siin ginpaandaman sigon nana ro anang mga kasimaryo nga likawan nga mag-gihit it baka it paka-aga sa kilid it suba.
Bangud nga tatlong residente eon it nasambit nga lugar ro ginasugid nga nakakita it buaya hay ginpakamayad it kapitan nga maghinyu sa Provincial Environment and Natural Resources Office ukon PENRO Aklan agud nga magpatigayon it inspection sa lugar ag magpangayo it nagakaigo nga advice kon ano ro andang dapat nga obrahon.
Sa makaron hay gusto it mga residente nga maikasa ro pag-usoy ag pagdakop sa buaya agud nga maibalik raya sa anang ilistaran.
