KALIBO, Aklan–Mabug-at eon nga paeas-anon sa mga drivers it pampublikong transportasyon ro ginapatuman nga kada domingo ag mabahuean nga pagtaas sa presyo it produktong petrolyo.
Suno kay Banga-Kalibo Jeepney Transport Service Cooperative President Leandro Lenciano, bangud sa sigidas nga pagtinaas it presyo it langis, naga-abot eon makaron sa 170 hasta 180 pesos ro andang round trip rason nga haeos nga owa eon it ginakita.
Suno kana nga haeos tanan nga mga drivers hay dismayado eon sa sobrang taas it krudo, kun sa siin ginakaon eon kara ro andang sangkiri nga ginakita.
Sa pihak kara, nagapati si Lenciano nga bukon it solusyon ro untat pasada sa nasambit nga problema.
Plano sigon nanda kaibahan ro chairman it andang pederasyon nga makipagpueong sa provincial government agud nga magpangayo it advice kon ano ro nagakabagay nanda nga obrahon partikular eon ro pagpasaka it pamasahe.
Nasayuran nga sa masunod nga domingo hay may naka abang eon man nga panibag-ong oil price increase tuga it owa sa gihapon natapos nga Russia-Ukraine crisis.
