KALIBO, Aklan—Ginkumpirma ni sangguniang panlalawigan member Nemesio Neron nga paga-imbestigahan nanda ro naeksperiensiyahan makaron nga sigidas ag owa naka-schedule nga power interruption it Aklan Electric Cooperative ukon Akelco.
Suno kana nga ro bukon it establi nga supply it kuryente hay mabuhay eon nga problema sa probinsiya kun sa siin pirmeng ginarason it electric cooperative sa kada may power interruption hay ro mga ginapatigayon nga maintenance works.
Mag-eowas kara, paga-usisaon man it provincial board ro pagka-delay sa operasyon it timbaban hydro-power plant project sa banwa it Madalag may pitong dag-on eon ro nagtaliwan.
Ginpahayag ni Neron nga target kunta nga makapag-operate it planta ko 2018 hasta 2019, apang hasta sa makaron hay owa raya naga-gana.
Nagaeaum man imaw nga may magsueod pa nga mga investors sa probinsiya nga magatukod it kapareho kara nga mga proyekto agud nga makaangkon it masarangan, renewable ag masarangan sa boesa nga sources it energy.
Gusto man sigon nanda nga masayuran kon kinahangean eon nga ma-repeal it kongreso ro EPIRA Law agud nga mataw-an it prayoridad sa pagbakae it kuryente ro mga electric power distributors.
