KALIBO, Aklan—Kasunod it ginaeauman nga pagdagsa it maabong deboto, turista, bisita ag merrymakers hay makaangkon it temporaryong pagkaduea it signal it mga telecommunications company sa festival zone area sa adlaw it dominggo.
Ginpahayag ni PSSgt. Jane Vega, tagapaghambae it Aklan Police Provincial Office (APPO) nga raya hay para sa seguridad it tanan kon sa siin masami eon raya nga ginahimo sa mga maeagkuan nga event kaparehas it Ati-Atihan Festival.
Suno pa kana, maskin nga uwa it namonitor nga maskin anong paeag sa kaadlawan it kapyestahan it patron nga si Sr. Sto. Niño hay kinahang-ean gihapon nanda raya nga himuon para masiguro ro kaeowasan it kada isaea.
Sa pihak kara, sa inisyal assessment it mga awtoridad nga naging generally peaceful ro mga naunang adlaw sa nagapadayon nga week-long celebration it festival.
Ginaeauman sigon nanda nga maging tayuyon nga malinong ag matawhay ro okasyon hasta nga matapos sa adlaw it dominggo.
Apela kara sa mga merrymakers nga maging responsable sa tanan nga oras ag likawan ro anumang bagay nga ginabawae ag magsunod eamang sa mga protocol para kasadyahan nga ginahandom.
