KALIBO, Aklan—Nagapabilin nga matawhay ro presenteng sitwasyon sa Hong Kong sa pihak it paglista kara it daywang kaso it Omicron variant it COVID-19 halin sa daywang dumueo-o nga naghalin sa South Africa.
Suno kay Bombo International Correspondent May Yapendon, tumandok it banwa it Banga apang presenteng nagatrabaho sa Hong Kong nga kalmado pa ro mga pumueoyo ag owa man it ginpagguwa nga pagbag-o sa mga sueondanan ro andang gobyerno.
Sa pihak kara, nagpagguwa sigon it travel ban ro gobyerno halin sa mga nasyon nga may nailistang kaso it Omicron variant eabi eon sa South Africa kung siin unang nadiskubrehan ro nasambit nga virus.
Presenteng nakapaidaeom ro Hong Kong sa Yellow Code Alert matapos nga makalista it daywang kaso it B.1.1.529.
Ginasugid nga owa pa nakaguwa ukon pamasyar sa mga matawong lugar ro mga dumue-o bangud natukiban nga positibo sanda sa bag-ong variant samtang naka-qauantine.
Dugang pa ni Yapendon nga ro mga residente nga gustong mag-uli it Hong Kong hay ginapasugtan nga magsueod sa rehiyon apang kinahang-ean nga fully vaccinated ag magaidaeom sa 21 diyas nga quarantine period.
Samtang, may gin-isyu sigon nga QR code ro gobyerno kung siin naka-install raya sa andang cellphone para madali ro pag-contact engkaso nga may mag-positibo sa lugar nga andang gin-adtunan eabi eon sa mga kaean-an.
